Сараптау Орталығы

ӘЭСИ

Бәсекеге қабілетті сараптамалық орталықты дамыту – Қордың үшінші басым бағыты. 2003 жылы Әлемдік экономика және саясат институты (ӘЭСИ) осы мақсатпен құрылды. Бүгінде бұл Қазақстанның жетекші «ми орталығы» (think tank). Бұл заманауи әлемнің өңірлік және ғаламдық міндеттерін талқылауға арналған ашық тәуелсіз сараптама алаңы.

Институт әлемдік экономика, геосаясат, қауіпсіздік, біріктіру және еуразиялық мәселелер бойынша қоғамдық пікірталастарға белсенді қатысады. Халықаралық деңгейде Қазақстан мен оның сыртқы саясаты туралы анық және дұрыс ақпаратты таратып, шетелдік сараптамалық орталықтармен ынтымақтаса отырып жұмыс істейді.

Институттың сарапшылар тобын Салтыбаев Ержан Айдарұлы басқарады.

Барлық аналитикалық материалдар – журналдар, мақалалар, баяндамалар мен басқалары – қолжетімді. ӘЕСИ қызметімен ресми сайтта толығырақ танысуға болады.

ASTANA CLUB

Астана клубы – жетекші сарапшы-саяси қауымдастық өкілдерінің диалогын дамытуды, жалпы әлемге және жекелей Еуразия аумағына әсер ететін жаһандық үрдістерді талқылау мен ең өзекті мәселелердің шешімін табуды көздейтін халықаралық пікірталас алаңы.

Астана клубы отырыстары дәстүрлі түрде Назарбаев Орталығында өтеді. Астана клубының серіктестері: Бейбітшілікті қолдаушы Карнеги қоры, Қытайдың заманауи халықаралық қатынастар академиясы (CICIR), Ресейдің халықаралық істер бойынша кеңесі (РХІК).

Астана клубының ұйымдастырушылары – Қазақстан Республикасы Тұңғыш Президенті – Елбасының Қоры және Қор аясында қызмет ететін Әлемдік экономика және саясат институты (ӘЭСИ).

2017 жылдың 13-14 қарашасында Назарбаев Орталығында Астана клубының үшінші басқосуы өтті. Халықаралық пікірталас алаңы әлемнің 27 елінен келген 60-тан астам қатысушыларды жинады.

Олар — белгілі саяси қайраткерлер, дипломаттар, танымал саясаткерлер, беделді ғалымдар және АҚШ-тың, Ресейдің, Қытайдың, Үндістанның, Еуропа елдерінің, Таяу Шығыстың, Орталық және Оңтүстік-Шығыс Азияның алдыңғы қатарлы «ақыл-ой орталықтарының» сарапшылары. Алғаш рет Клубтың жұмысына жоғары дәрежелі саясаткерлер – бұрынғы мемлекет басшылары Абдулла Гүл (Түркия), Вацлав Клаус (Чехия), Данило Тюрк (Словения)  қатысты.

Кездесудің басты тақырыбы – «Үлкен Еуразия-2027: текетірес немесе серіктестік» – стратегиялық шешімді талап ететін өзекті сын-тегеуріндер, қауіптер, ықтимал тәуекелдер және жаһандық саясат мәселелері негізінде қалыптасқан.

Клуб мүшелері алдағы онжылдықта еуразиялық мегаконтинент дамуының сұлбасын қалыптастыратын негізгі трендтерді талқылады. Олардың ішінде әлемдік және аймақтық державалар мүдделерінің ара-қатынасының, ядролық фактордың күшеюі және шиеленістің артуы, сауда мен санкциялардың қарама-қарсы келуі, халықаралық лаңкестік пен қауіпсіздік, көші-қон және экология, интеграциялық үдерістер және экономикалық ынтымақтастық проблемалары болды.

ASTANA CLUB ресми сайты